LOU SARMOUNEY / LE JHACASSOUS

23 avril 2015

Manuel Valls e la religion

Classé dans : ACTUALITATS,Alhors,Au hiu deus jorns,OPINION,Politica — Lo Sarmoneir @ 12 h 58 min

« Vouloir s’en prendre à une église, c’est s’en prendre à un symbole de la France », vachí les paraulas de Manuel Valls que vèni de lugir dens l’Est Républicain. Aqueras paraulas m’an acipat. Tè, n’en sui quasi damorat museishuc. Non, una glèisa n’es pas un  simbòle de la França, ni mèi d’Occitània ni de nat pòple ni de nat estat.  ‘Quò’s un simbòle dau catolicisme. Manuel Valls vodré insinuar que lo catolicisme es coma una religion d’estat en França ? Que lo catolicisme es la sola religion que pausi pas de problèmas ? Mès bondiu, arrestatz donc de balhar a la religion aquera importança ! S’agís – enfin, diuré s’agir – de cresenças e practicas personalas. Es que l’espiritisme, la sorcelaria, l’astrologia, brèf tot çò que concèrna les causas non-concretas, n’en hèsen un afar de politica ? De v’rai, M. Valls, vos haré pas esclapotar de ríser – o vos esmalir benlèu – se los astrològues e mediums s’assemblèvan en haut lòc demb de politicians o se lurs biscanhas  avièvan una guèrra ? Diu vivant !!!

 

4 réponses à “Manuel Valls e la religion”

  1. Danièl dit :

    Fau pas hèser díser au prumèir menistre çò qu’a pas dit ni çò qu’a pas pensat tapauc. Qu’acò plasi o desplasi, lo catolicisme hèi partida integranta de l’istòria francesa e les catedralas e autas glèisas sonn de monuments istoricas au contrari de les mosquèias o das quites temples bodistas. La catedrala de Rems hèi autant partida dau patrimòni istoric francés que lo pont dau Gard o que les arenas de Nimes. Fau pas glorificar lo passat mès fau pas cedar tapauc a la tentacion d’hèser coma los que ràivan d’una sola causa, « de faire du passé table rase » e que vodrenn que renègam nòstas arrigadas grecò-latinas e judeò-cristiana per pura ideologia o per pura coneria.

    • Lo Sarmonèir dit :

      Benlèu qu’ec dishut pas nimèi qu’ec pensèt, mès èran tanplan les paraulas raportadas per lo jornalista. Hèser partida dau patrimòni istoric de la França vòu pas diser representar la França. Tròbi que los monuments religios son fòrt bròis, tot coma un pilòt de sites e monuments, sabi pas, botam pr’exemple l’estuari, o lo Grand Teatre. Mès disi pas pr’autant que son de simbòles de la França.
      Aquò m’hèi bien dòu de véser l’importança qu’es balhada a la religion e a ses institucions, per rapòrt a les causas concrètas. Lo patrimòni culturau, les cresenças personalas, òc-ben ! Mès diu pas anar pus lunh, vietdauca.

  2. Danièl dit :

    Lo vrai simbòle (casi religiós) de la França es la lenga francesa e l’Academia francesa. Un pauc coma en Belgica lo rei o en Soïssa la Confederacion elvetica (qu’es en realitat una federacion). Se tiras acò a cadun d’aqueths país, edzístann pas mèi, damb o sens religion.

  3. Danièl dit :

    Pensi qu’òm pòt pas reproxar a cauqu’un, òme politic o pas, de considerar qu’una glèisa es un simbòle (e pas LO simbòle)de la França, un simbòle au mièi d’autes coma lo drapèu o la torr Eifel o la Marselhesa e bien d’autes enquèra. La laïcitat a res a véser damb sa caricatura laïcarda, lo laïcisme que sap pas hèser auta causa que de chapar dau curè.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

 

Luxeetvolupte |
Actuel |
Newyorkcity2012 |
Unblog.fr | Créer un blog | Annuaire | Signaler un abus | Insidelayers
| Lanouvelleperspective
| love star