LOU SARMOUNEY / LE JHACASSOUS

10 septembre 2014

La Fe es sonqu’Amor – còp de gula

Classé dans : Au hiu deus jorns,OPINION — Lo Sarmoneir @ 21 h 14 min

En entrant dens una glèisa de Nancy, èi trobat una pregària — o puslèu una sòrta de tracte catolic tradicionalista — que m’a geinat.  Son titre es « prière dérangeante » e vau vos la traduíser apui vos la comentar :

« Benlèu qu’aimaretz lugir aquesta pregària hèita au Kansàs a la dubertura de la session dau senat. Sembla qu’aquesta pregària destorba encara certènas personas. Quòra lo pastor Joe Wright estut damandat per díser la pregària de dubertura de la session au senat dau Kansàs, tot lo monde s’atendèva end’una pregària ordinària, mès vachiu çò qu’entenduren.

Senhor, vènem cap a tu anuit per te damandar perdon e per te damandar de nos guidar. Sàbem que ta paraula nos ditz : « Malur aus qu’apèren ben çò qu’es mau » e ‘quò’s exactament çò qu’am hèit.

Am perdut nòste equilibre espirituau [ dau XVIIIe siègle ] e am shambertat nòstas valors [ idèm ].

Am expleitat lo praube e apèram aquò « loteria », [ Sui bien d’acòrd. ]

Am recompensat la paressa e am aperat aquò « l’aduja sociala », [  Se jo, que sui briga canhós, beneficièvi pas de l’aduja sociala, ‘quò’s a díser l’aduja au lotjament e les borsas sus critères sociaus, au lòc de me destinar ad estar ingenior o cercaire, serí adara un praube caitivèir sonque bon a horgalhar dens lo borrièr. Auta causa, me sembla que la Glèisa a per vocacion d’adujar socialament, pas vrai ??? ]

Am tuat nòstes mainatges pas encara neishuts e am aperats aquò « libra causida », [ Se son pas encara neishuts, son pas encara legalament daus èstes vivents mès son una partida dau còs de la mair ! Òr, cadun a lo dret de se des·hèser d’un tròç de sa persona ! Apui, fau benlèu gardar lo resultat d’un viòl ? Imaginatz una goiata que vèn d’auger brilhantament lo bac demb mencion TB e que prevei d’hèser d’estudis de medecina o auts hauts estudis ; mès son pair o son toton es alcoholic e la viòla ; vachiu donc sa via, sa carrèira, que s’arrèstan còp sec. Esque diu hèser nèisher aqueth nanòt qu’es tanben son miei-frair ? Un nanòt que, benlèu, baterà a son torn, que serà pas aimat, que vingrà benlèu un mangane e qu’acabarà per se suïcidar en preison ? Sufiré pas simplament a la prauba victima de goiata d’ahortar e de tornar préner sos estudis ? D’escotar sa consciéncia en imaginant les consequéncias dau dishar-hèser puslèu que de lugir una Bibla datant de 2 000 ans ? ]

Am abatut daus ahortaires e am aperat aquò « la justícia », [ Sui d’acòrd tanben, la pena de mòrt diu estar abolida pertot. ]

Am neglijat de disciplinar nòstes mainatges e am aperat aquò « desvalompar lur estima de se ». » [ Probable, òc. Encara que depend de çò qu’apèran « disciplinar »… « maserar a grands  patacs de Bibla dens lo quiu ? » ]

Vesi que los catolics tradicionalistas vòlen espandir la pensada americanò-biblista a nòsta… Una brava reculada sociala, cadun per se e Diu reconeisherà los sons. Non, amics, la fe n’es pas aquò, la Fe es Amor e sonqu’aquò, que cadun s’en sovèni !

 

5 réponses à “La Fe es sonqu’Amor – còp de gula”

  1. Daniel dit :

    Soi d’acòrd damb tu sus casiment tot etseptat ton avís sus lo mainatge a vàser que seré, d’après tu, una partida dau còs de la futura mair. Lugís l’article que seguís e veiràs que dau punt de vista de la lei i a res qu’abonda dens aqueth sens.

    http://ledroitcriminel.free.fr/la_science_criminelle/penalistes/la_loi_penale/infraction/pcpales_incrim/sainte_rose_enfant.htm

    • Lo Sarmoneir dit :

      Digam que condensèri 2 frasas en una :
      A- es l’acte de neishença qu’es lo debut de l’existença legala d’un individut
      B- a mon avis scientific, consideri que lo mainatge a vàser es una partida dau còs de la mair, vist que li pòt pas viver tant qu’i es religat per lo « vedilhèir » (mès bon, qué pòdem diser daus frairs (o de les sòrs) siamés/-esas ? Pff… vasta question…

  2. Daniel dit :

    S’escótam sonque la sciéncia, tot es en realitat un barrejadís de nuatges d’electrons que se telescòpann e se túmann. Mès a nòsta petita escala i a un patòc de causas que la sciéncia poirà jamèi esplicar. I a pausa, una vièlha amiga comunista, qu’espliquèva tot per « la sciéncia », quòra li damandèvan lo perqué e lo comà de tot çò qu’edzista respondèva : « C’est la science. »
    Una auta manièra de s’hèser una religion quòra ne’n an pas…

  3. Danièl dit :

    La Fe es sonqu’Amor. M’aduvi damb tu mès acò s’aplica pas a totas les religions. « Aimaràs ton proxènn coma tu medís », ‘cò se tròba dens la Torah e lo Nevèth Testament mès briga dens lo Corann… Coma dirénn a nòste, i a quicòm que tòca. Belèu que « lo proxènn » a pas la medissa significacion en arabe que dens les autas lengas. Dejà qu’en arabe hèsenn pas de diferéncia entre « laic » e « atèu’…

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

 

Luxeetvolupte |
Actuel |
Newyorkcity2012 |
Unblog.fr | Créer un blog | Annuaire | Signaler un abus | Insidelayers
| Lanouvelleperspective
| love star