LOU SARMOUNEY / LE JHACASSOUS

14 mai 2013

Aquò’s l’espòrt ?

Classé dans : ACTUALITATS,Au hiu deus jorns,OPINION — Lo Sarmoneir @ 20 h 31 min

Quora vésem çò que s’i passèt a l’aucasion de la victòria deu PSG, i a bien de qué se díser « lo foot, quala salop’ria » ! Precisi ma pensada : lo foot professionau, au solide ! Tot aquò’s un meishant barrejadís de manganes drogats, de margajats gaunits de sòus…. Argent, violença, racisme, talas son les valors deus beaufs e companhia que supòrtan los clubs de foot. Bien entendut, haràn los malins, mès qué hèsen a part se fóter suu canapè demb una bièrra davant un match,  e gula que gularàs… Es que s’i cresen ! Coma se lo foot, un espòrt donc un leser, èra mèi important que d’auts problèmas… Enfin bon, panem et circenses coma diré l’aut.

Se guèitatz demb quala violença se compòrtan certèns… Me damandi d’on lesi vèn. Jo, per exemple, aimi Bordèu, aimi colhonar a prepaus deus Tolzans, Biarnés, Vasadés e auts Parisièns, mès anguerí pas, egau, los escagassar sonque per aquò ! Mès bon, n’i'n a de mau « desgrossits » (mau acairats ?)

E òc, aquò’s l’espòrt !!!

3 réponses à “Aquò’s l’espòrt ?”

  1. Danièl dit :

    Pensi qu’aqueths comportaments violents son pas pròpres au foot. Son la consequéncia d’un ensauvatjament de la societat divut a una pèrda galopanta de repères. A nòsta epòca an pas jamèi parlat autant de « mixitat », d’ »egalitat », de « convivialitat », de « víver-ensemble », de « mestissatge », fau hèser dens l’ »emocion », fau pas « discriminar », fau pas « estigmatizar », e ne’n passi una profusion. Taplan tot aquò es sonque borratge de cap per camoflar una manca de valors umanas remplaçada per una cupiditat generalizada que vòu pas díser son nom. Tot diu èster rentable e bon a gitar un còp usat o desmodat, e les quitas gents taben. Lo nivèu escolari es en casuda libra quitament se los resultats positius au « bac » diven èster a tot prètz superiors a 85%. D’un ase fau ne’n hèser un shivau de corsa. Lo trabalh manuau es desvalorizat. I a un chaumatge mostrós e i a de professions que mancan de braç. Vau mèi pagar chaumaires a damorar a son e i a de situacions ont vau mèi pas trabalhar que de tornar trobar un trabalh damb un salari inferior a les prestacions socialas. Tot aquò fòrma una meishanta ambiença ont banhan los joens. Les condicions son idealas per favorizar una violéncia latenta que damanda sonqu’a explosar. Lo « foot » ne’n es un exemple caricaturau.

    • Lo Sarmoneir dit :

      Ma fe òc, segur… Mès l’espòrt, precisament, n’es pas mèi un leser que diuré adocir les « moeurs » mès quauquarren demb enjòcs tròp gròs, e li balhan tròp d’importança per rapòrt a causas vitalas.

  2. Danièl dit :

    L’espòrt, anuit, es l’avatar dau « panem et circences » das Romans. Aquò’s pas per res que los jogaires professionaus hèsen partida de la casta das novèths nòbles dau monde de l’espectacle. Per los que son a les manetas, anuit coma dens l’Antiquitat, aquò’s un moièn poderós d’hèser en sòrta que les gents se tènin tranquiles. Mès les quitas gents s’hèsen complicis d’aquera manipulacion. Fau véser l’entosiasme falordàs e infantile das « supporters »! Faudré sustot pas s’avisar de los-i hèser remercar. Me sovèni perfèitament de la Copa dau Monde en 1998. Los quites mediàs batèven lo tambor pr’hèser saber qu’aquera copa anèu’ sanjar la faça de la França damb la famosa equipa « black-blanc-beur ». Falèu enténder les vociferacions das braulhaires e véser los drapèus tricolòres a bien de fernèstas. Pus res comptèu’. Los quites intelectuaus nos borrèvan lo cap au subjèt d’aquera equipa representativa d’una França mestressa d’un destin exemplari. Una jornalista celèbra s’èra permetut de se’n préner a « tous ces pauvres chats qui n’ont rien compris » per parlar das praubes colhons (ne’n èri un e ne’n soi totjorn un) que gausèvan criticar tot aqueth cirque.
    Tot aquò per díser que l’espòrt professionau, lo foot en particulièr, es devengut una aberracion a basa de gròs sòus e en mème temps un moièn formidable de manipular l’aupinion, tot aquò agrevat per aqueste ensauvatjament das rapòrts sociaus dont parlèvi dens mon messatge precedent e qu’es caracteristica de nòste temps.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

 

Luxeetvolupte |
Actuel |
Newyorkcity2012 |
Unblog.fr | Créer un blog | Annuaire | Signaler un abus | Insidelayers
| Lanouvelleperspective
| love star