Mon país (Nicòla Lapòrta)

Dens mon país / I a lo biule e l’olom / Lo bedoc e l’aubar

Casses mastats / Castanhèirs dinc au cèu / Desplegats

E i a pins a milèirs / Dinc a la mar (x 2)

 

Quand vèn l’estiu / I a lagostas e griths / Dens los prats henejats

E la cigala / Que nos ditz quand segar / E ligar

E ausèths a milèirs / Ausís que cantan (x 2)

  

Au mes d’aost / Plantas, bèstias e gents / Escanats de sequèir

Atenden tots / Bona pluja d’auratge / Au dessèir

Eslombrics a milèirs / Prigle davant / Prigle darrèir

 

Dens mon casau / Pomas e arresims / A banastras amassats

Higas, esquilhòts / N’i a per tots los qui son / Ahamiats

E i a flors a milèirs / Sènt qu’aulorejan (x 2)

 

Quand vèn la pluja / Dens l’auguicha e lo bruc / Corri lanas e bòis

I a ahorèsts / Jaugas, sègas tanben / Hèi p’arren

E i a ceps a milèirs / Bons a cercar (x 2)

 

Quand vèn lo fred / E l’ironda e la grua / L’an dejà anonciat

Lo cèu se plenha / De corriòlas d’ausèths / Bien pressats

De palomas a milèirs / L’òmi es au pit (x 2)

 

Dens ma maison / De garralhas e pias / Burla un huc batalhèir

Quand vèn l’ivèrn / Barri lo fred dahòra / E lo vent

I a estelas a milèirs / Au cèu, la nèit (x 2)

 

Lo vint-e-quate / Per la nèit la pus longa / Vènen tots a l’ostau

Quand vèn Nadau / Pausi suus chaminaus / Lo capsaut

I a potons a milèirs / De pòts a gautas (x 2)

 

E dens mon còr / Per mon cunh de campanha / Boha un vent d’amor

Per sas beutats / Que me plenhan los ulhs / E lo cap

I a cançons a milèirs / Per mon país (x 2)